Modeontwerper van SA gaan in Los Angeles in Kalifornië uitstal

’n Jong modeontwerper van Oos Rand is genooi om sy uitrustings eersdaags by ’n modeweek in Los Angeles in Kalifornië uit te stal.

Die stylghoeroe William de Beer (28), van Willet Designs Couture, is deur die voorsitter van die Art Hearts Fashion Week in Los Angeles genooi om dié modeweek in Maart by te woon.

“Dit is sy grootste droom om die internasionale loopplanke met sy unieke skeppings te verras,” sê Leonie Cronjé, De Beer se woordvoerder.

De Beer het onlangs twee modevertonings gehou om die sowat R250 000 in te samel sodat hy sy droom kan verwesenlik om die wêreld met sy unieke skeppings te verras.

Die eerste modevertoning is in Januarie by Industrial Coffee in Centurion gehou en die tweede een is die afgelope naweek by Tilt Resto Bar in Boksburg gehou.

Cronjé sê albei geldinsamelings was baie suksesvol.

“Die meeste uitrustings wat by die modevertonings gedra is, sal ook by die modeweek in Los An­geles ten toon gestel word,” sê Cronjé.

“Onder andere die ballerina Diani Gernandt, die aktrise Zetske van Pletzen en die The Voice-finalis Jono Johansen het op die loopplank geloop,” sê Cronjé.


Enjoyed this post? Share it!

 

Leave a comment

Your email address will not be published. Required fields are marked *